28 nëntori shënon ditën e pavarësisë së Shqiptareve duke u simbolizuar me flamurin shqiptar. Është histori e tërë e brezave që sakrifikuan dhe u flijuan për një të ardhme të kombit dhe vendit tonë, si simbiozë e kombit, lidhje e thellë në mes të elementeve të ndryshme që kanë kontribuar në formimin e identitetit kombëtar, sikur gjuha, historia dhe vlerat e përbashkëta që janë kultivuar me shekuj, dhe është Flamuri kombëtar simbol i lavdisë që barazon ndjenjat e Shqiptareve.

Urime dita e simbolit të lavdisë.

Poezi nga Fan Noli.

O Flamur gjak, o flamur shkabë,
O vënd e vatr’ o nën’ e babë,
Lagur me lot, djegur me flagë,
Flamur i kuq, flamur i zi.

Fortesë shkëmbi tmerr tirani,
S’të trëmp Romani, as Venecjani,
As Sërp Dushani, as Turk Sulltani,
Flamur i math për Vegjëli

Flamur që lint Shën Kostandinin,
Pajton Islamn’ e Krishtërimin,
Çpall midis feve vllazërimin,
Flamur bujar për Njerëzi.

Me Skënderben’ u-lavdërove
Dhe në furtun’ i funtmi u-shove,
Me Malon prapë lart vrapove,
Yll i pavdekur për Liri.

Sa shpesh pastaj për-dhe u-shtrive
Me zjarr e zi u-ndeze u-nxive,
Po çdo mizor me shpat’ e grive,
O fushë-kuq, o shkabë-zi.

Përpjetë pri-e Shqipërinë,
Përlintj’a shpirtin dhe fuqinë,
Diell për vllanë, yrnek për fqinë
Për botën ëndr’ e qjell i ri.