Prishtinë, 23 qershor 2026

Fakulteti i Inxhinierisë së Ndërtimit i Universitetit të Prishtinës organizoi një punëtori profesionale kushtuar prezantimit dhe diskutimit të iniciativës për krijimin e një Sistemi të Avancuar të Parashikimit Meteorologjik dhe Paralajmërimit të Hershëm ndaj Rreziqeve Natyrore në Kosovë.

Në këtë aktivitet morën pjesë përfaqësues të institucioneve akademike, institucioneve publike, ekspertë të meteorologjisë, hidrologjisë, inxhinierisë së ambientit, menaxhimit të rreziqeve natyrore, si dhe profesionistë të tjerë të interesuar për forcimin e kapaciteteve të Kosovës në fushën e monitorimit, parashikimit dhe reagimit ndaj fenomeneve ekstreme natyrore.

Gjatë punëtorisë u prezantuan koncepti, objektivat dhe komponentët teknikë të platformës së propozuar, duke u theksuar rëndësia e zhvillimit të një sistemi modern dhe të integruar të paralajmërimit të hershëm, i cili do të mundësonte ofrimin e informacioneve të sakta dhe në kohë reale për ngjarje meteorologjike ekstreme dhe rreziqe të tjera natyrore.

Në prezantime u trajtuan teknologjitë moderne të parashikimit meteorologjik, sistemet e monitorimit në kohë reale, modelet numerike të parashikimit të motit, aplikimi i sistemeve gjeohapësinore dhe përdorimi i platformave mbështetëse për vendimmarrje. U theksua se një sistem i tillë do të kontribuonte në rritjen e gatishmërisë institucionale dhe shoqërore për përballimin e rreziqeve natyrore dhe reduktimin e pasojave të tyre.

Pjesëmarrësit diskutuan rëndësinë strategjike të krijimit të një sistemi gjithëpërfshirës të parashikimit dhe paralajmërimit të hershëm, në përputhje me standardet dhe praktikat më të mira ndërkombëtare. Një vëmendje e veçantë iu kushtua nevojës për bashkëpunim ndërinstitucional ndërmjet institucioneve qeveritare, universiteteve, autoriteteve përgjegjëse për menaxhimin e emergjencave, institucioneve kërkimore dhe organizatave të tjera relevante.

Punëtoria shërbeu gjithashtu si forum për shkëmbimin e ideve dhe përvojave lidhur me sfidat që sjellin ndryshimet klimatike, ngjarjet ekstreme meteorologjike, përmbytjet, thatësirat dhe ndikimet e tyre në komunitet, infrastrukturë dhe mjedis.

Në përfundim të aktivitetit, pjesëmarrësit shprehën gatishmërinë për të mbështetur zhvillimin e mëtejmë të kësaj iniciative dhe vlerësuan se krijimi i një sistemi të avancuar të paralajmërimit të hershëm paraqet një hap të rëndësishëm drejt forcimit të sigurisë publike, mbrojtjes së infrastrukturës kritike dhe rritjes së qëndrueshmërisë së Kosovës ndaj rreziqeve natyrore dhe ndryshimeve klimatike.

Fakulteti i Inxhinierisë së Ndërtimit mbetet i përkushtuar që, përmes ekspertizës së tij akademike dhe kërkimore, të kontribuojë në zhvillimin e iniciativave me rëndësi kombëtare që mbështesin zhvillimin e qëndrueshëm, mbrojtjen e mjedisit dhe avancimin e kapaciteteve profesionale dhe institucionale të vendit.