Të nderuar profesorë, studentë, bashkëpunëtorë të Fakultetit të Inxhinierisë së Ndërtimit të Universitetit të Prishtinës,

Sot, me krenari dhe emocion të veçantë, shënojmë 55-vjetorin e themelimit të institucionit më të rëndësishëm arsimor dhe shkencor në vendin tonë – Universitetit të Prishtinës. Ky përvjetor është dëshmi e një rruge të gjatë plot sfida, por edhe suksesesh të jashtëzakonshme që e kanë bërë këtë universitet një vatër të dijes, inovacionit dhe zhvillimit akademik, duke dhënë kontribut edhe njësia jonë akademike.

Gjatë këtyre dekadave, Universiteti i Prishtinës ka shërbyer si një shtyllë e fortë e edukimit dhe progresit shoqëror. Me breza të tërë profesorësh e studentësh të përkushtuar, ky institucion ka dhënë kontribut të paçmuar në ndërtimin e një shoqërie të ditur, të lirë dhe të zhvilluar. Sot, ne nuk festojmë vetëm një përvjetor, por edhe vlerat e dijes, lirisë dhe përkushtimit ndaj të ardhmes.

Në emër të Fakultetit të Inxhinierisë së Ndërtimit, në këtë ditë të shënuar, u shpreh mirënjohjen më të thellë të gjithë atyre që e kanë dhënë kontributin e tyre në rritjen dhe suksesin e Universitetit të Prishtinës – profesorëve, studentëve, stafit akademik e administrativ, si dhe partnerëve ndërkombëtarë që kanë ndihmuar në fuqizimin e tij.

Ndërsa shikojmë përpara, e kemi për detyrë të vazhdojmë rrugën e dijes dhe inovacionit, të ndërtojmë mbi trashëgiminë e krijuar dhe të sigurojmë që Universiteti ynë të mbetet një qendër e ekselencës akademike, një dritë udhërrëfyese për të gjithë ata që aspirojnë për një të ardhme më të ndritur.

Me nderime Dekani i FIN, F. Grajcevci