Gjatë ditës së sotme (20 janar 2025) zhvillohen takime ndërinstitucionale ndërmjet Fakultetit të Inxhinierisë së Ndërtimit të Universitetit Politeknik të Tiranës dhe Fakultetit të Inxhinierisë së Ndërtimit të Universitetit të Prishtinës.

Aktivitetet përqendrohen në vazhdimin e organizimit të punëve institucionale të përbashkëta, të cilat janë aktualisht të rëndësishme për të dy institucionet e arsimit të lartë (IAL).

Fokusi kryesor i takimeve është përgatitja për organizimin e Konferencës Ndërkombëtare të Inxhinierisë së Ndërtimit (ICCE 2025), e cila është planifikuar të mbahet nga data 15 deri më 17 tetor 2025.

Në nivel të departamenteve, organizohen takime të ndara me qëllim identifikimin e mundësive për projekte hulumtuese të përbashkëta, duke shfrytëzuar asetet dhe kapacitetet e dy IAL-ve që janë në funksion.

Thellimi i bashkëpunimit akademik mes dy institucioneve mbetet qëllimi kryesor i këtyre takimeve, duke synuar avancimin e përbashkët në fushën e arsimit dhe kërkimit shkencor.